आइतवार, असार १९, २०७९

कम्प्युटरले दृष्टिविहीनलाई आत्मनिर्भर बनाउँदै

२३ कार्तिक २०७३, मंगलवार १०:४२

मोरङ, २३ कात्तिक । दृष्टिविहीन रहेका  मोरङ उर्लाबारीका बालकुमार तामाङलाई कम्प्युटर चलाउन सक्छु भन्ने विश्वास थिएन ।

उनी आफैँले केही वर्षअघि कम्प्युटर सिक्ने इच्छा त राखे, तर दृष्टिविहीनलाई सिकाउने व्यवस्था नहुँदा उनको इच्छा अधुरै रह्यो । तर, मोरङको राजघाटस्थित ग्रामीण अपाङ्ग सेवा सङ्घले एक्काइसौँ शताब्दीमा कम्प्युटरसँग खेल्ने उनको इच्छालाई साकार बनाइदियो ।

यस्तै, दृष्टिविहीन नै रहेका सुनसरी चिमडीका देवनारायण रौनियारलाई पनि कम्प्युटर चलाउने औधि चाहना थियो । चिमडीकै एक विद्यालयमा अध्यापन गराउँदै आएका  उनी सङ्घबाट कम्प्युटर तालिमसँगै हाल कम्प्युटरका काम सजिलै गर्न माहिर छन्  । सबै भाषामा टाइप गर्ने र नेटका सबै काम गर्नसक्ने उनले बताए ।

उनले भने  “म त अब स्कुलमा विद्यार्थीलाई कम्प्युटर पढाउन पनि सक्छु जस्तो अनुभूति भएको छ ।”

तामाङ र रौनियारजस्तै सङ्घबाट निःशुल्क कम्प्युटर तालिम लिइरहेका पूजा शर्मा, युवराज निरौला, विपीन अधिकारी, मञ्जु दनुवारलगायत दुई दर्जन दृष्टिविहीनले कम्प्युटरबाट आत्मनिर्भर बन्न तालिम लिन व्यस्त छन् ।

ग्रामीण अपाङ्ग सेवा सङ्घ, राजघाटका अध्यक्ष जीवनाथ खतिवडाका अनुसार अपाङ्गताका कारण हीनताबोधमा बाँचिरहेका दृष्टिविहीनलाई आत्मनिर्भर बनाउने उद्देश्यले सङ्घले छ महिने निःशुल्क कम्प्युटर तालिम सञ्चालन गरेको हो ।

गत असारदेखि आयोजना भएको सो तालिममा दुई दर्जन दृष्टिविहीन व्यक्तिले तालिम लिइरहेका छन् । तालिमको प्रशिक्षण पनि खतिवडा आफैँले गरिरहेका छन् । खतिवडा दृष्टिवाचक सफ्टवेयरसम्बन्धी मोरङ जिल्लाकै एक मात्र अनुभवी एवम् दक्ष व्यक्ति हुन् ।

उनका अनुसार दृष्टिविहीनले कम्प्युटर चलाउँदा दृष्टिवाचक सफ्टवेयर (जज) को सहायताले कम्प्युटर चलाउछन्। जजले निर्देशन गरेको आधारमा किबोर्ड मात्र प्रयोग गरी कम्प्युटरका सबैखाले काम गर्न सकिन्छ ।

आँखा देख्ने व्यक्तिले भन्दा पनि शुद्ध र छिटो गरी नेपाली र अङ्ग्रेजी दुवै भाषामा टाइप गर्ने, नेट–इन्टरनेट तथा फेसबुक चलाउने जस्ता कार्य सहजै गर्न सकिने तालिममा सहभागी देवनारायण रौनियारको भनाइ छ । रासस

प्रतिकृया लेख्नुहोस्:

सूचना विभाग दर्ता न: २२०/०७३-७४
सम्पादक तथा सञ्चालक :
मोतीलाल पौडेल
मोबाइल : ९८५८०५००१०/९८५१२६००१०

YouTube Videos from Kahbarera HD

Subscribe
0 Shares
Tweet
Pin
Share