शनिबार, मंसिर १८, २०७८

अज्ञात रोगका कारण तीनको मृत्यु

२३ जेष्ठ २०७३, आईतवार ०७:०३

गाईघाट (उदयपुर), २३ जेठ । उदयपुर जिल्लाको पश्चिमी पहाडी क्षेत्रको हर्देनी गाविसमा अज्ञात रोग फैलिँदा १० दिनभित्र तीन जनाको मृत्यु भएको छ ।
मृत्यु हुनेमा हर्देनी–२ का ३० वर्षीया सविना नेपाली, १८ वर्षीया भीमकुमारी नेपाली र ५५ वर्षीय गङ्गाबहादुर परियार रहेका छन् ।
जेठ १० गतेदेखि सो क्षेत्रमा अज्ञात रोग फैलन थालेपछि १० दिनभित्र तीन जनाको मृत्यु भएको स्थानीय शिक्षक नवीन कार्कीले बताए ।
सुरु सुरुमा घाँटी सुन्निने, बिरामीको श्वासप्रश्वास प्रक्रियामा अवरोध हुने र शरीर सुन्निँदै गएर तीनदेखि पाँच दिनभित्र बिरामीको मृत्यु हुने गरेको अर्का स्थानीयवासी कृष्णप्रसाद खत्रीले बताए ।
यस विषयमा जिल्ला स्वास्थ्य कार्यालय उदयपुरका सूचना अधिकृत दुनियाला यादवले अज्ञात रोगका कारण हर्देनीमा तीन जनाको मृत्यु भएको बताए ।
दुई जना बिरामीको उपचारका लागि सुनसरीको धरानस्थित बिपी मेमोरियल अस्पतालमा उपचारका क्रममा मृत्यु भएको र एक जनाको कटारी अस्पतालमा मृत्यु भएको यादवले जानकारी दिए ।
बिरामीको रोग धरानमा पनि पत्ता नलागेका कारण शनिबार जिल्ला अस्पताल उदयपुरबाट दुई जना डाक्टरसहित अन्य पाँच जना स्वास्थ्यकर्मीको टोली हर्देनीतर्फ अध्ययन गर्नका लागि पठाइएको यादवले बताए ।
त्यसैगरी हर्देनी–२ कै निर्मला राईको अवस्था पनि चिन्ताजनक भएका कारण काठमाडौँ पठाइएको छ । गाउँका अन्य मानिस पनि बिरामी हुने क्रम बढ्दै जान थालेपछि अहिले हर्देनी, लेखानी क्षेत्रमा जनजीवन त्रसित बन्दै गएको स्थानीयवासी दिपेश राउतले बताए ।
अज्ञात रोग फैलिन थालेपछि हर्देनी गाविस वडा नं २ मा अन्य वडाका मानिससमेत जान डराएको स्थानीयवासी बताउँछन् । समयमा नै स्वास्थ्य मन्त्रालयबाट विशेष टोली नआएर सो क्षेत्रको स्थिति भयावह हुने स्थानीयवासी शिव खत्रीले बताए । रासस

प्रतिकृया लेख्नुहोस्:

सूचना विभाग दर्ता न: २२०/०७३-७४
सम्पादक तथा सञ्चालक :
मोतीलाल पौडेल
मोबाइल : ९८५८०५००१०/९८५१२६००१०

YouTube Videos from Kahbarera HD

Subscribe
0 Shares
Tweet
Pin
Share